Ä Glock hänn in Rhodt mer aus uralter Zeit...

Hoffen wir, daß Ihr browser
mp3.files unterstützt
Der Parre do 
sieht mer von Johr zu Johr immer mäh ähnlich St. Georgskirche mitten im Dorf


Ä Glock hänn in Rhodt mer aus uralter Zeit
-so find mer känni weit unn breit -
vum "Helig" in Baade 1519 gegosse
-Ball 500 Johr sinn seitdem veflosse -
"Osanna" g`nennt- unn`s Vater Unser se leit'
Sie klingt aach gut- Mer heert se weit!
Vier Bilder sinns, wu ehrn Mantel dun ziere
Die wemmer betrachte -debei aach studiere,
was die Glock uns will saache, wammer se leit
unn was ehr Rufe fer uns bedeit:

Die änd Gestatt- der äne Mann,
des esch de Sankt Sebastian
in de Pestzeit- frieher -vielgenennt
Doch heit esch´s so, daß oft mern nit kennt:
Er hett dem Kaiser opfre selle
-unn dut als Chrischd sich degeeche stelle-
als weer der Gott- de Kaiser vum reemische Staat
drum hott als Stroof do so en Soldat,
damit mer an ihm zeicht sei kaiserlich Macht
off gräßliche Weis ne grad umgebroocht:
von Pfeile getroffe- mit Stricke gebunde
er blut aus schmerzliche, deedliche Wunde

Unn doch lernt mer bei`m off Gott se baue
-des kann mer beim Sebastian schaue-:
wommer schbieert, wie do äm die Händ sinn gebunne
daß Gott mer vetraut aach in schwere Stunde:
Helf du mer zu me gure End!
Ich gebb mich ganz in dei gure Händ!
Du bist mein Trost in Fräd unn Leid.
Ich hoff off dei Barmherzigkeit.

Off d`anner Seit St. Martin mer find
Er sitzt off seim Gaul- unn s wäß jeres Kind
ob in de Neeh ob weit enfernt,
was mer bei St Martin lernt:
daß mer dält mit dem in Not:
Reidersmantel- Blick- unn Brot:
Däle sell mer Fräd unn Leid
uns gure Wort zud` rechte Zeit
An Sankt Martin mer schaut an,
daß mer Chrischdus henn gedan,
was mer dun em Mensch in Not.
Im Menschebruder begeechent uns Gott!

Links newer `m- der in Rischdung unn Speer
unner ihm esch en Drache: St Georg esch der:
wu im Kampf mittem Beese nit unnerliecht
de Ritter, wu de Drache besiecht:
So selln aach meer in unserer Zeit
fer Friede unn Gerechtigkeit
kämpfe gege beese Mächte
wud Menschhäät vesklave unn veknechte:
de Eichesinn unn die Dummheit bekrieche
unn in dem Kampf nit unnerlieche
Gott sei gut Welt sell nit vederwe
-daß Bääm unn Vieh unn Mensche sterwe-
weil jeder froocht bloß, was em nitzt
unn nit: wie mer es Leewe schitzt
Doch kämpfen allää mit solche Waffe
wu Friede fer die Menschhäät schaffe

Unn schließlich unn endlich off de Glock mer find
Maria mittem Christus-Kind
Maria wu uns - wie ze Kana -saacht:
was ER eich saacht- des dut! des macht!
Maria die esch voll vun Gnad,
weil der wu abwend, was uns schad
sich fer uns unn d` Welt eifind
in ehrm Schoß als klännes Kind.
Unn kään`s muß sei vegesse - velore
seit Chrischdtus fer die Welt gebore
unn uhne Lieb, wu kommt von Gott
unn uhne Troschd in unsrer Not
 
Wann unser alt Glock mit de annre erklingt
wann se "ce- es- f- g- se mit de annre singt:
Allää Gott in de Heeh sei Ehr! "
Dann sucht ehr Botschaft bei uns aach Geheer!
Gott will se loowe- unn Gott ehre
unn ladt uns all ei, off sei Wort ze heere,
will Mut uns so mache zem Hoffe unn Glääwe
unn aach zem Liewe- fers ganze Leewe!

[zurück]

zurück zum Start unn jetzt esch Ruh!



[zurück]
[ zur Startseite der Homepage]