Vum Paradies:
E Buch- ehr Leit- des muß -ehrlich- ich saache
Des lieb` ich schunn seit Kinnerdaache.
Des du - neechschd de Biwwel - ich arg schätze
unn hebb bis heit draa mei Ergetze
- allää an der Art schun, wie drin mer bericht`t.
Ich mään: Die Pälzisch Weltgeschicht,
vun Paul Münch- vefaßt im letschde Johrhunnert
so daß sich en Pälzer draa frät- se bewunnert:
Mer blickt drin off die ganz Weltgeschicht serick
mit dem richtige- dem Pälzer Blick
Mer lernt, sich se frooche, was des Alles bedeit
fer uns in de Palz- fer Pälzer Leit
Unn aus dere Perspektiv
erwachsen Gedanke groß unn dief:
Sogar aus de Biwwel werd drin vezehlt-
Des find ich prima Qualidäät,
besonnerschd, was mer drin vemeld
vum Aafang an vun dere Welt,
wie se fer Planze unn Diere, Vechel unn Affe
unn fer die Mensche hot de Herrgott erschaffe:
Do schlaacht mei Herz glei heeher als,
wanns hääßt, daß in de klänne Palz-
einstmools der Gaarde weer gewest
den heit noch s Paradies mer häßt.-
In junge Johre- ich kann`s nit veheele,
wollt mer was annres meer freilich vezehle-
Leit, warn`s wu mer denkt, `s weern gelehrte Männer-
unn ausgewies`ne Biwwelkenner-:
Mer sich des sellt fer immer merke:
`s Paradies weer ganz weit weg g`west- dort bei de Derke,
unn noch weiter weg, wu`s de Ararat
de Eiphrat unn de Digris hat-
Dozu saach ich bloß: >Narrebosse!
Ich will mich nit beiirre losse:
Es Paradies war in de Palz
so erscheint mer`s jedenfalls:
Do wachsen Äppel, Beere, Keschde
-de Wei geroot offs allerbeschde-
do wachsen die schänste Kerschebääm-
schänner als in de beste Trääm
Erbse, Bohne, Sparchle, Wersching,
Quetsche, Feige, Mannle, Persching
Die Bääm sinn dick all- groß unn bräät
unn alles vun prima Qualidäd
Fricht, so sieß die dun dort reife
so daß mer grad meecht denooch greife
Des esch des Land mit große Wälder
des esch e Land mit bunte Felder
Dort leewen Mensche voll Schwung unn Kraft
dort steht es Leewe voll im Saft
Drum, ehr Leit, so glääb ich als:
`s Paradies war in de Palz.-
Mer kanns noch heit erahne, vekoschde
dort war `s geheime Land im Oschde
Dort esch de wahre Orient-<
Unn jerer wäß, wu nit grad pennt:
daß iwerall, wu mer dut stehe,
mer sieht im Oschde `d Sunn offgehe-
unn westlich vun uns- do sacht mer sich als:
"wu`d Sunn offgeht, do liecht die Palz"-
Des dut kän Mensch bestreide-
Drum- denk ich- daß vor Zeite-
weil- bis jetzt do die Fricht sinn so gut unn so sieß
bei uns war- wie g`saacht- es Paradies
Doch was -ehr Leid- meer armen Dropp-
mer will pardout nit in de Kopp-
obwohl mer des nit kann besdreite:
Es war so nit zu alle Zeite!
Am Aafang, ich saach`s eich, ehr liewe Leid,
ganz am Aafang- vor de Zeit-
bevor Gott hot Himmel unn Erd gemacht,
do war`s noch nix mit dere Pracht;
kä Plänzel, ke Streicher- unn kä Wälder,
kä Bäch, kä Flißcher, aach kä Felder,
Do war nix do vun all dem Seeche:
Ke Sunn war do unn aach ken Reeche
Unn aach ken Mensch fer de Erdborm se pfleeche
fer Planze unn Diere se vesorche unn heeche:
Doch dann- wie Gott hot die Erd gemacht-
wu mer bewunnert in ehrer Pracht,
do hot er s` Erdreich selwer begosse,
mit Wasser, wu aus de Quell esch g`flosse
Des hot de Erdborm feicht gemacht.
Doch dann hot schließlich de Herrgott g`saacht:
Aus de Ackerscholl sell de Mensch entstehe:
en Menschkind wu dut offrecht gehe-
mi`me Kopp fer se denke- mit Herz unn Hand
me gut Gemiet unn mit Ve`stand.-
Des weer fer mich mei Frääd unn Spaß:
ich bloß´em de Lewensodem in die Nas,
so daß er dann voll Saft unn Kraft
in meim Sinn was Rechtes schafft.-
Ich schaff- so wahr mer mich Herrgott dut häße-
off dere Erd des lewendisch Weese
So hot dann er im Oschde - in dem herrlich Land
wu esch als Paradies bekannt-
de ersche Mensch sich nei gesetzt,
damit der dra sich froh ergetzt-
Er schenkt em de Schatte vun große Bääm,
-so war`s wie in de schänschde Trääm-
enner schänner als de annre- mit Fricht gut se esse,
damit er sein Herrgott nit sell vegesse:
Mer hot dort gar ken Kummer gekennt,
Gott hot em all sei Glick gegennt:
E Leewe war`s voll Frääd unn Glick
in dem schääne Gaadestick:
Zwä bsonnere Bääm in seinre Mitt warn gewest
-wie jerer wäß, wu sei Biwwel lest-
De Bääm vum Leewe- mit sießer Frucht,
wie weit unn breit mer lang se sucht
unn noch en annre- unn des muß mer wisse:
Des war de Bääm vun dem Gewisse:
an dem mer lernt fer alle Zeite,
was gut esch, was bees esch se unnerscheide
unn beides in de Griff se griege
unn iwwer beides se vefiege.-
En große Fluß hot dort fer frisch Wasser g`sorgt-
im Gaarde, wu Gott hot gelehnt, geborgt-
dem Mensch, daß er `n bewahrt - bewacht-
ne bepläntzelt, ne schitzt- mit Vestand unn Bedacht.
Dozu hot Gott dem Mensch die Erd aavetraut-
daß er in Friede se bewahrt unn mit Sorgfalt bebaut-
unn des gelt fer alle Zeit
fer Pälzer unn fer annre Leit.-
So war des mi`m Gaarde, wu de Mensch derf pfleeche-
ne derf umsorche, ne umheeche,
so daß dort alles gut wachst unn reift-
wie jerer wohl ganz gut begreift.-
Unn Gott saacht zu`m: Dodrin derfschd leewe
vun allem, was der dein Herrgott hot gewwe -
S`esch genung do- s`hot werklich ke Not!
Bloß der än Bääm in de Mitt, der bringt der de Doot.
Vun dem - des derfschde nit vegesse-
off kän Fall derfschde vun dem esse.
Unn de Herrgott hot g`saacht, des esch nit gut,
wann en Mensch so allää fer sich sei dut-
Er sell nit bleiwe- einsam- velasse
E Wese sell `n umgebe, was gut zu`m dut basse
Unn so hot dann in ehrer Pracht
de Herrgott fer sei Welt gemacht:
die Vechelcher do unnerm Himmel,
unn Diere aller Art- es ganze Gewimmel-
Alles was krawwelt -fliecht unn rennt-
Des hot de Mensch dann mit Name genennt-
Und doch noch fiehlt sich de Mensch allää-
`s Leewe war`m bloß halb so schää:
Obwohl`s doch war es Paradies
mit Fricht so saftich unn so sieß-
hot er nit`s ganze Glick erfaßt
Er sucht noch nooch was, wu zu`m baßt
Sucht iwwerall off dere Welt,
bis dann em de Herrgott die Frää zugesellt.-
Aus `re Ripp vun seinre Seit deet er se mache
Wie de Biwwel uns dut saache:
Wie de Mensch in diefe Drääm
ruht sanft im Schatte vun de Bääm
hot Gott se `m im Diefschloof ganz noh bei seim Herz,
dort wu mer fiehlt die Frääd, de Schmerz-
-es weer dann mer hett drin e Herz aus Stää-
entnumme fer sei Werk, die Frää-
Der Mensch sich an de Kopp glei faßt:
"Des esch e >Menschin<, wu zu mer paßt
Fläsch aus meim Fläsch -vum gleiche Blut:
Ach was esch se mir so gut:
Gedälte Frucht schmeckt doppelt sieß!"
Jetzt war komplett fer`n`s Paradies
Drum dut en Mann Vadder unn Mudder velasse,
sucht bis heit noch des Wese, was zu`m deet basse!
Was war der Mensch doch so zufriede
mit all dem Glick, wu`m war beschiede.
Ach wer`s doch noch heit so zu unsre Zeite!
Dann weers noch ganz annerschd in unsre Breite:
Doch Ehr wissen, ehr Leid- den schlimme Schluß-
S`esch kumme, wie es kumme muß:
Die Frucht, wu mer gedält hot- vun de Schlang vefiehrt-
macht, daß am End mer`s Paradies noch veliert:
daß oft de Mensch sich off d`Erdscholl rumqueelt-
daß em oft `s Glick im Leewe fehlt
unn mer oft sich vegeblich ploocht,
 unn nooch em Sinn vum Leewe froocht-
daß die Frää mit de Kinner hot Sorge unn Laschd-
daß de Kummer esch oft unser Gaschd
unn manchmool deet aach de Ehestand
besser häße >Wehestand<
Zum Glick esch Jesus off die Erd zu uns kumme-
daß nit die Hoffnung uns werd ganz g`numme-
e Ziel braucht de Mensch, wert fer`s Leewe-
gut daß mers kenne unn erstrewe:
Wann zu End weer aller Neid unn Streit,
wu nix bingt als wie Herzeleid,
wann Lieb deet zeehle off dere Welt
unn nit bloß `s Geld unn nochmools Geld
unn Macht, wu de annre unnerdrickt
wann- nochmools annerschd ausgedrickt-
die Mensche nit sich hasse- sich achten unn ehren
unn gege Haß unn Krieg sich wehren
wann mer d` Schepfung meecht bewahre mit Herz unn Vestand
iwwerall im ganze Land:
do deet mer noch immer nit ins Paradies gelange:
do hätt mer erschd >menschlich< se sei aagfange!
Ach, daß mer Mensche all deeten erstreewe
in Jesus seim Geischd unn seim Sinn se leewe!
Wann mit viele Mensche an viele Orte
-statt uns se begnieche mit große Worte-
mer deeten den neichschde, den kläne Schritt gehe
wu hiefiehrt zum Friede: do deet mer sehe,
wie do unser Handle breecht gure Frucht,
wie weit unn breit mer se als sucht
Unn des weer Frucht, so gut unn sieß:
E klännes Stick vum Paradies.
Mecht so sich unser Erd vewandle
mit Gottes Hilf- durch unser Handle-!
Meecht de Friede vun Gott - aus Gottes Hand
bewahre uns unn unser Land!
So sell es sei- in Jesus seim Namen.
Drum saach ich: Amen, Amen. Amen