Lukas 15 -vom barmherzigen Vater

Heit feiern mer mit es Feierwehrfeschd.
Gelade sinn mer all als Gäschd
unn erweisen gern die Ehr
unsrer gure Feierwehr-
Mer feiern unnerm Schatte vum Linnebäm
unn fiehlen uns grad wie dehäm.-
Unn weil Sunndach heit esch, werd fer junge unn alte,
so wie sich`s g`heert aach Kerch do gehalte-
Ehr Leit, was denken er: was weer,
wann`s nit geeb bei uns die Feierwehr?
Wann nit bei uns weern junge Leit,
wann Not am Mann esch, sem helfe bereit?
Weil: wann`s im Derfel emool brennt,
kummt glei die Feierwehr gerennt-
unn bringt en Wolkebruch Wasser ins Haus,
bumbt se so manch en Keller aus-
esch prompt unn wie de Blitz so schnell-
wu mer se braucht -glei an de Stell.-
Drum denk ich mer, ehr liewe Leit:
Ä Vorbild fer die Chrischdenheit
-wammers mool recht als meecht vestehe-
mißt mer in unsre Feierwehr sehe:
Dodroff kummt doch aa: Daß prompt unn schnell
en Chrischdemensch isch an de Stell
wanns gelt, am annre die Neichschdeliewe
nit mit Worte bloß se iewe
Daß dort, wu`n Mensch sich sorgt unn queelt
es nit an Hilfsbereitschaft fehlt
unn jeder an seim Blatz unn Ort
-so wie`s uns lehrt es biblisch Wort-
off sei Weis meecht Veantwortung traache
unn im Leewe `s Gure waache
Zum annre isch im ganze Land
die Feierwehr devor bekannt,
daß se aach se Feire vesteht,
wanns sich um die Kam`radschaft dreht:
Esch de Brand erschd mool gelescht,
trefft mer gern sich als zu me klänne Feschd,
unns Schoppeglas macht dann sei Rund
Mer feiert gern so manchi Stund,
weil Esse unn Trinke Leib unn Seel sammehalt
unn aach die Gemeinschaft lewendisch erhalt.-
So -denk ich- mißt aach des fer en Chrischdemensch zehle:
Mer sell nit allää sich dorchs Leewe queele:
Dääle es Glick unn dääle die Not
so wie de Wei unns däglich Brot.-
Unn daß mer immer wirrer sich off des meecht besinne,
was uns will zu rer diefe Gemeinschaft vebinne:
ich mään die gud Botschaft, wu "Evangelium" mer nennt,
wie jerer wäß, wu sei Biwwel kennt.
Heit wemmer bei Sankt Lukas leese
was fer uns sell gute Nochricht häße
Im fuffzehnte Kabbidel- unn des sell`mer heere
als gure Botschaft unn christliche Lehre
Vun Jesus selbschd esch `s e Gleichnis- geschicht
-vielleicht selwer erlebt, vielleicht bassend erdicht,
so wie aach heit kennt entsprechend bassiere
mer braucht bloß mools Leewe so richtig studiere.
Unn ich hoff unn ich winsch mer, daß jerer entdeckt:
Dodrin isch e Stick vun mer selwer ve`schdeckt-
daß jerer also vun sich aus erkennt:
Ich bin von Gott do jetzt mitgemäänt
Es esch e G`schicht, wu wohl jerer dut kenne
"Gleichnis vum velor`ne Sohn" dut gern mer se nenne:
Ehr wißt doch: die vum Vadder, wu sich dut erbarme
unn offnemmt sei zwää Buwe mit weit uffene Arme-
Unn die G`schicht do vum Vadder esch uns Botschaft vun Gott,
wu an uns feschdhalt im Glick - in de Not
unn weer aach vun uns `s Elend gar selwer ve`schuld-
So ganz uhne End esch sei gettlich Geduld
Mer heer`n heit vun dem Sohn, wu sich fiehlt ganz famos
"Staark bin ich- so saacht er- unn kräftig unn groß
Kann jetzt allää die Veantwortung traache
Des will ich jetzt endlich meim Vadder mool saache:
>>Ich such mei Glick, geh in die Welt
Mein Weech geh ich jetzt, off mich selwer bloß g`schdellt-
Vadder du wäschd, dei Sohn, der esch dichtisch
Heeer mer gut zu, was jetzt kummt esch wichtig:
Guck, Vadder, mer missen doch all emool sterwe-
wie weer`s? Gebb mer schun jetzt mei Erbe!
Gebb mer des, was mer zusteht, mein Dääl, geb mern doch!
Noch bin ich jung! Ich schaff`mich hoch!
Fort geh ich jetzt unn such mei Glick
unn kumm als Mann vun Welt serick
In de Wannerschuh dut`s mich jucke
Wann ich dann hämkumm, do werschde gucke.
Des gebbt e Feschd! Des geht iwwer Stunne!
Dann hebb ich mei Glick fer immer g`funne
Was ich aapackt werd gut- unn des werd richtig
Ich bin jo nit dumm, bin schlau unn bin dichtig!
Ball kumm ich häm mit em Sack voll mit Geld
Ab gehts jetzert in die Welt!<<"
De Vadder dut am Hofdoor stehe,
dut em in die Fern noochsehe
wie er sei große Schritt dut mache
unn hot im Kopp gar dausend Sache!
De Sohn esch schun ball in re fremme Stadt
wu`s Glick scheinbar schun off ne waart
Er bschdellt sich glei e groß Stick Worschd
unn was se Trinke- fer de Dorschd-
er bschdellt de beschde, de deierschde Wei
Drammänner Auslees muß es sei!
Unn wie es so esch im Lauf vun d`Welt:
Du hoschd viel Freinde, solang de hoschd Geld-
Wie gern er ne immer als vezehlt,
wie ar`sch er sich hett als gequeelt
beim Vadder dehääm unn er weer doch so jung,
unn so voller Plän unn so voller Schwung
Unn was weer er so schlau, gewieft unn dichtig
unn was er macht, werd gut unn richtig:
"Hääm geh ich bloß mimme Sack voll Geld"
unn jerer staunt: "en Mann vunn Welt"
Unn immer werd dann e Schluck als gedrunk`
Wei esch jo do, meh als genung
unn esch er all werd neier b`schdellt
Nit schlecht leb sich`s bei soviel Geld
Unn immer werd e Rund` spendiert
vum Weech hii sem Glick werd fabuliert
Borsch unn Mädcher du`m fladdiere
E großes Leewe dut er fiehre
Freinde unn Schätzcher hot er genung
unn wirrer werd e Schluck gedrunk`
d`Mussik spielt, mer werfelt, danzt, dut singe
mer feiert unn lacht, esch gurer Dinge
bis dann -ziemlich ball schunn- wie`s de Lauf esch vund` Welt-
de Beitel esch leer unn fort all sei Geld
Borsch unn Mädcher sinn aach fort
wissen jetzt en bess`re Ort
Unn als hett des g`rad noch em g`feehlt
e deier Zeit es Land jetzt queeelt
Uhne Ärwet, uhne Geld
steht allää er in de Welt
"Was sell ich dann bloß aafange?
De Maache dut sei Recht ve`lange!
Kä Geld! Nix se beiße! Was fer e Schand!
E Hungersnot im ganze Land!
So viel wu sich dun nooch Ärwet dränge!
Ich will mich aach an so`n Reiche hänge!"
Ach, was macht mer in de Not
nit alles fer e Stickel Brot!
Unn er trefft so`n reiche Mann
wu em Aarme helfe kann.
Der saacht prompt zu`m: "Vun mir aus kannschd gehe
unn drauß nooch de Wutze sehe!
Geh zud` Sai im Wutzestall
wann dei gures Geld esch all!"
Doch der gebbt em nix se esse.
Nit mool des, was d`Sai als fresse.
Unn so fangt er an se klaache
unn dut bei sich selwer saache:
"Ach, was esch des fer e Not!
Hätt ich doch Wasser unn drucke Brot!
Ach, was geht es meer so schlecht
schlimmer als em letschde Knecht!
Ach, wie knurrt mer doch de Maache!
An die Bruschd dut er sich schlaache:
`s Glick wellt ich fenne, so en Hohn!
Hart bin ich g`schdrooft- en bitt`re Lohn!"
Im Schloof unner d` Johannisbääm
sieht er de Vadder in seine Trääm
"Kennt ich doch hääm bloß- ich halts nimmi aus!
Kennt ich serick doch ins väderlich Haus!
`s weer zu schää um wohr se sei
Wie dief bin ich doch ins Elend nei!"
Unn so esch er in sich gange
"Kennt ich mei Leewe bloß noch äämool aafange!
Kennt ich doch bloß mi`m Vadder rede
unner seine Ääche trete!
"Ich selber bin schuld draa "- deet ich dann saache
Ich du se Recht mei Uuglick traache
unn mei Uuglick des wiegt schweer
Vor Gott bin ich schuldig unn vor Deer
Ich bin am End! Was geht mer`s schlecht!
Weer ich bloß bei deer en Knecht!
Ich bin g`schdrooft- des esch mein Lohn!
Unn ich war doch mool dein Sohn!
Wie stolz bin ich fortgange- g`sucht hebb ich`s Glick
Velumpt unn vekumme-so geh ich serick!"
Unn so faßt er sich jetzt Mut:
Werd die Sach vielleicht doch gut?
Odder kreischd de Vadder -mit Recht- voll in Raasch`:
"Was fer e riesegroßi Blamasch`!
Uubedingt hoschd welle off Achse!
Jetzt bleib mer dort, wu de Peffer dut wachse!
Zwää Sehn hebb ich g`hatt, die warn mer gebore
Enner devu bleibt mer g`schdorwe- esch fer immer ve`lore!"
Unn wann er mich doch noch aanäämt?
Unn mich am End gar doch beschämmt-
mich aanemmt als sein letschde Knecht?
Wie weer des gut unn schää unn recht!
Ich will`s ääfach mool prowiere
Ich hebb jo nix mäh se ve`liere!"
Unn so dut er de Häämweech waache
Er lääft so weit die Fieß `ne traache
Sei Schuh, die sinn schun lang verisse
unn sei Klärer ar`sch veschlisse
Wie esch sei Haut so schwarz vebrennt!
unn wie er lääft unn rennnt unn rennt!
Unn wie er so mit letschder Kraft
guckt, daß er de Häämweech schafft,
dut ne dort sein Vadder sehe.
Der dut vor de Hausdier stehe.
Als deet er noch immer waarde,
steht er unn guckt dort am Zaun beim Gaarde
Unn er eilt seim Sohn entgeeche
wu dort sich hiischleppt off stauwische Weeche:
" Er esch es werklich, ganz uhne Zweifel!
Ach, er esch`s , des Eelendsheifel!"
Sei Not riehrt ne aa, unn voll Erbaarme,
nemmt er ne off mit uffne Aarme
Dut`ne an sei Herz sich nemme
als mißt er nit sich fer ne schämme
Bevor er heert: "Des dut mer lääd!"
besorcht er`m schun e Feschddaachsklääd,
en Siechelring aach fer an die Hand,
saacht´s rum iwwerall im ganze Land:
"Eer all sinn gelade, mer feier`n e Feschd!
Eer sinn all willkumme, mei liewe Gäschd!
Mein Sohn, fer mich so lang veloore,
der esch mer heit wie nei gebore
E Maschdkalb werd g`schlacht- unn d`Musik sell schbiele
Unn ehr sellen all mei Fräd mitfiehle!"
Die Danzmussik spielt schun, froh dut mer springe,
mer lacht, dut frohe Lieder singe
Gefeiert werd mit hellem Ton,
weil g`funne esch de ve`lorene Sohn
So lang war er fort, weit weg- wie doot
Doch jetzt esch se End die ganze Not
Bloß drauß im Feld, der äldere Bruder
der heerrt`s unn er schellt: "De stinkische Luder!
Erschd lääft er fort, loßt uns hucke, ab in die Welt
vebraßt unn veschbielt es gure Geld!
Loßt `s sich gut gehe, unn sacht sich: Morche
sell de Vadder fer mich sorche!"
Doch de Vadder, der geht zu em mit rer Riesegeduld.
"Was steerschd dich jetzt an seinre Schuld?
Feier doch mit- mit unsre Gäschd!
Loß doch die Ärwet, geh mit mer zum Feschd!
Dein Bruder esch hääm ins väderlich Haus!
hot serick endlich gfunne- sei Elend esch aus!"
Unn doch will der noch gar nit heere
Soviel dut em noch an seim Brurer do steere:
"Ich, ich muß schaffe unn schufte unn schwitze!
Der anner, der derf bei de Weiwer rumsitze,
die wu em schääne Äache mache
unn noch was-wäß- ich- fer -Sache
So`n Kerl, wu so `s gure Geld dut vebrasse,
den sell ich nit veachte? nit hasse?
Ruiniert unsern Ruf- veplempert es Geld
haut ab, loßt uns hucke, zieht ab in die Welt!
Unn du duschd em`s beschde Kalb noch schlachte,
statt als en Lump ne se betrachte,
Du holschd noch fern s beschd Fässel Wei
-sogar e Speetlees muß es sei-
So unnerschditzschd` du die Lidderlichkäät
Wo bleibt dann do die Gerechtigkäät?-
Ich het aach gern als g`feiert statt se schufte unn schwitze
Deet aach gern um`s Feier mit de Freinde als sitze
en Ziechebock broote- mit annre als feire
en gure Droppe drinke- genau so en deire
-so wie`s bei uns esch seit heit scheinbar Sitte
Doch nie hebb ich welle dich dodrum mool bitte-
Ich muß immer schaffe unn schufte unn renne!
Ich hebb kä Zeit, mer ä Frääd mool se genne!"
De Vadder freilich gebbt nit nooch
aach wann`s noch so`m veschlaacht die Sprooch-
Er saacht zu`m ganz freindlich, in ruhichem Ton:
"Jetzt heer mer gut zu, mein liewer Sohn:
Du reddschd do als vum stinkisch Luder
Vegeschde ganz: des esch dein Bruder?
Er war wie doot fer uns- ve`lore
Er esch uns jetzt wie nei gebore.
Drum esch werklich fer uns - jetzt- do unn heit
fer uns all sem Feire Zeit
Kumm, mein Großer, ich lad dich doch ei,
Kumm, geh doch mit, sei mit debei!
Heit derf es Leewe e Fesdchd fer uns sei!
Kumm mit, mer däälen jetzt Brot unn Wei!"
Ob der`s jetzt hot welle heere?
Unn sich nit weirer an seim Brurer duut steere?
Ach wann em die Neigier jetzt packt unn queelt
Des werd von Jesus nit mit-vezehlt.
Er froocht nit lang, ob`s uns macht Ve`druß
Er loßt uns offe grad de Schluß
Unn doomit meecht er - zu käm sein Schade-
uns all - Mann, Kind unn Frää - eilade,
daß mer sich recht meecht besinne,
es Leewe in Jesus seim Sinn nei beginne-
daß mer aach den jetzt mit Lieb betracht,
wu esch vun aller Welt ve`acht
daß all mer umkehr`n zu Gott hii - sem Leewe
unn ddodruff richte unser Schdreewe.
E Leewe werd uns so g`schenkt, wu nit muß vegehe-
e Leewe voller Sinn, wu kann bestehe
So geht bei uns weirer die Gleichnisgeschicht,
vun uns esch es dann, was se bericht,
wann jerer vun uns drin entdeckt,
was vun ihm esch dodrin ve`schdeckt-
was drinsteckt vun uns- vun unserm Leewe
vun dem, was mer hoffen unn erschdreewe.-
So daß die Biwwel in de Hand
uns esch wie`n Spichel an de Wand
- Ob mer uns finnen in de Suuch nooch em Glick-
im Sohn, wu velore kehrt serick
unn dann mit weit weit offene Aarme
werd offgenumme voll Erbaarme?
- Odder mer mäh uns erkennen im älter Sohn
wu rummotzt vebittert unn froocht nooch seim Lohn-
wu fordert Gericht unn Gerechtigkäät
weil nit er vesteht die Barmherzigkäät
-Vielleicht erkennt mer im väderlich Herz
e Stick vun uns in Frääd unn Schmerz-
e Stick weit uns im Vadder, wu all reicht die Hand
wu alle zwää Buwe bleibt zuugewandt
unn känn vun`ne ausschließt vun seim Erbaarme
sucht änner wie de annre mit weit uffne Aarme
Unn der wu die Geschicht hot domools vezehlt,
Jesus, der hot mit seim Gleichnis gewellt
uns zeiche, wie vun Gott die Barmherzigkeit
meecht wandle die Mensche, es Leewe, die Zeit.
Laßt uns sei Rufe doch nit vebasse!
Liewe iewe- unn nit hasse!
off Gott vetraue unn drum glääwe unn hoffe
dief im Herz drin fer `d Mensche offe!
So daß die Lieb meecht unner uns walte-
Lieb, wu dut die Welt erhalte!
Gott -wu die Lieb esch, will so uns begechne
-will uns unn unser Leewe seechne-
unn so uns begleite dorch die Zeit
jetzt unn bis in d`Ewigkeit.-