Pingschde in Rhodt esch`s- wie alle Johr wirrer

Pingschde in Rhodt esch`s- wie alle Johr wirrer
Mer loßt sich in de Owwergass nirrer
Mer fiehlt sich do grad wie dehääm.
Unner de bliehende Keschdebääm
feiert mer`s Heimat- und Bliere-feschd
Mer richt fer die Gäschd aach vun allem es Beschd`
richt Wurschd und Weck -richt Fläsch-schbieß und Wei
Mer ladt Johr fer Johr aach fer zum Gottesdienschd ei.
Un dort wu de Wind loßt die Keschdebääm rausche
do wemmer off die biblische Botschaft lausche
Unner me griene Dom sinn heit mer ve`eint-
Mer frän uns, wann die Sunn` uns scheint.
Unn alles, was lebt in de weire Flur-
in de frische Luft - in erwachder Nadur
des sell herzlich mit uns de Schepfer lowe
fer alle gure Gab` von owwe-
Heit wemmer vum Alldag die Sorche vergesse
Heit dun mer beinanner sitze und esse,
beim Wei unn im Gschpräch unser Leewe genieße
unn abschalte vun dem, was uns sunschd dut vedrieße-
Doch wemmer des nit aus de Ääche veliere
-und des sell mer dann aach unserm Feire abschpiere-
daß heit`s sichs um viel meh als e Wei-feschd bloß dreht-
daß es uns heit um "Pingschde" geht-
Es geht heit doch um mäh als bloß `s Trinke unn`s Esse
aach wann `s so viel- so schnell vegesse
Pingschde- so lernt mer in Land unn Stadt-
määnt, daß die Kerch ehrn Gebordsdag heit hat-
Gott will durch sein Geischd sei Kerch erneire-
des dun mer heit - an Pingschde -feire
Wann Geischd vun Gott die Mensche erreicht,
Kläämut und d` Ängschdlichkeit vun uns weicht.
Wie s domols esch gewest
mer in de Biwwel leest-
Lukas in de Aposchdelgschicht
hot uns dovuu genaures bericht:
Mer hot sich seit Pingschde nit ängschdlich veschdeckt
Begeischd`rung hot nei es Leewe geweckt
Voll Gottesgeischd war bei ne es ganze Haus
-voll Feier und Flamm`und Sturmesgebraus.
Vorher do hot kenner sich geriehrt
Angschd hot die Kehl ne zugeschnieert
Mer bleibt unner sich - veschdawwert, veschdeert,
so daß en kenner sieht unn heert
Als weer bis heit Karfreidaach noch
so starrt mer in e fischder Loch
Hot Chrischdus nit so Jinger gewellt,
wu wirken in Seim Sinn in aller Welt?
Doch henn se geduckt sich wie nit recht gescheid
en armes, armes Haifel Leit.
Unn wann die Angschd em lähme dut
dann fehlts an jerem Lewensmut
Unn do nei hot dann de gettliche Geischd
die Mensche in ehrer Angschd erreicht
Nooch Gott seim Heilische gettliche Wille-
hot er se welle mit Kraft erfille
Unn die Jinger henn g`fräd sich wie nit recht gschdeid-
S froocht kenner noch länger, "was denken die Leit?"
Unn als die Ängschdlichkeit vegeht
En frische Wind jetzt bei `ne weht
Mer traut sich rei jetzt in die Menge-
mer waacht sich mitte ins Gedränge
Unn `s waarn dort beinanner viel Leit- viel Gäschd
mer trefft sich schließlich dort zum Feschd.
Unn fiehlt sich dort grad wie dehääm
an Pingschde in Jerusalem
Unn all die mehr und aach weniger Fromme.
die sinn zu`m Ernde -Feschd dort komme-
Die erschde Fricht` dun draus` schun reife
so daß mer graad meecht nooch `ne greife
Siwwe Woche nooch Oschdre - em Passafeschd.
trefft mer sich wirrer- mer feiert mit Gäschd-
wie jerer wäß, wu sei Biwwel kennt-
Mer hot`s es Wochefeschd genennt,
Aus allerlei Länner dut mer sammekumme
unn hot aach sei Freinde unn Nochbre mitg`numme-
grad wie bei uns- unn Kerch werd g`halte
-grad wie bei uns- fer junge unn alte-
Fer e gure Ernt mer bede dut
unn aach um en frische, en gure Mut-
Minanner denkt mer in dere Rund`
an de Sege vom Himmel- und de göttliche Bund
Mer blickt serick off alde Zeite
wie Gott em aach in d` Not dut leite-
mer denkt an viele alde Gschichte
wu die Biwwel dut berichte
-mer denkt an die Knechtschaft im Ägypdeland
- wie Gott selbst hot mit mächdicher Hand
gefiehrt sei Volk zu`m gure End`
und hot so manchi Not gewendt
-was jetzt äm aach Mut macht, es Gure se waache-
Fer all des will mer "Danke" jetzt saache.
Aus aller Herre Länner -vun Siede und Norde-
vun Oschde und Weschde- aus allerlei Orte
dut mer sich jed`Johr so sammefinne
-sich off de Gottesbund besinne.
Doch wer nach Jerusalem zum Feschd esch kumme,
hat domools an Pingschde ganz was Neies venumme.
Im annre Fall - wer wollt`s beschdreite
do weern mer allegar noch Heide-
Nix hett mer g`heert vum Chrischdedum
vun Neechsdelieb und so- unn drum:
wann Geischd vun Gott die Mensche macht wach
esch des e gewichtigi - großi Sach
Unn jerer hot g`heert, wie die Jinger Gott lowe
jerer in Seiner Sprooch- spiert de Geischd wu vun obe-
will in uns wirke - in unserem Handle
unn will unser Herze vun Grund uff vewandle
Gott Sei Dun dun se lowe- aus vollem Herz preise-
die Lieb aus Gott, wu er dut erweise
uns all in Christus Jesus - unserem Herrn-
So isch zu de Mensche -von nooh und von fern-
aus aller Welt kumme de Geischd vun Gott
Doch mancher saacht bitter -unn saacht es voll Schbott:
"Die sind doch schlichtweg all bloß b`soffe"-
Doch mancher besinnt sich- geht in sich - bedroffe
Manch en hot Pingschde angeschdeckt
mit Frääd unn Kraft- so daß er entdeckt
e neie Hoffnung- en neie Mut
e Ziel -en Sinn- fers Leewe gut
Unn doch -was an Pingschde esch bassiert
des hot nit jerermann kabiert,
De Sinn vun de Pingschde bleibt manch em veborge
unn so bleibt mer noch sticke in seine Sorge-
unn saacht sich aach weirer noch "uhne mich"
Unn mancher bleibt bei seine Sprich
unn merkt gar nix vum Geischd aus Gott
- hot bloß noch Worte voller Spott
"Die sinn bschdimmt voll von sießem Wei
Des muß Drumänner Speetlees sei
Zwää, drei Schoppe hänn die ganz bschdimmt getankt-
orrer vier orrer fimfe- wann des nit langt-
Do simmer drin Fachleit. Meer kennt sich do aus
Do werd aach bschdimmt nix Rechtes draus
do fiehlt mer sich ganz stark unn famoß-
Do wern Sprich gekloppt- do fiehlt mer sich groß-
Des esch en Rausch bloß- des macht se froh
Am nechschde Daach isch nix meeh d`vun do
De Petrus, der ergreift sofort
im Name vun de annre und fer all se es Wort-
Er wäß jetzt esch die rechte Zeit-
Jetzt muß ich`s saache- alle Leit:
Er hot die Botschaft frei unn schlicht
des Wort vun Chrischdus ne ausgericht
"Mer sin nit bsoffe, liewe Leit"-
S esch doch frieh am Morche- noch nit esch`s Zeit,
beduddelt in de Rausch se sinke-
Es isch noch lang nit Zeit sem Trinke
Wann Gott mer lowen mit Herz und Mund-
hat des wahrhaftig en annre Grund:
Was Gott uns hot zug`saacht vor langer Zeit,
des esch jetzt g`schehe- jetzt unn heit:
Er steht fer des grad, was er hot ve`sproche.
Gott hot noch nie sei Wort gebroche:
Gott schenkt uns die Kraft, was wohr esch se saache
Sei Wort in alle Welt se traache.
Vun all ehrm vewirrte, vekehrde Wese
kann aus dem Geischd allää die Welt genese
Große unn Klenne will er lenke-
Alde und Junge will er b`schenke.
der Geischd, wu uns recht `s Bete lehrt
wie fer en Chrischdemensch sichs`s g`heert
Fer uns der dann noch Worte find
wann sprachlos werd e Gotteskind.
Der helft uns, daß mers Gure beginne-
der bringt in unser Herz unn Sinne
Weisheit- Rat-Vestand unn Zucht
wu nooch Gott seim Wille sucht
Der Geischd- kummt werklich nit vegebens-
in unser Welt, der Geischd des Lebens.
Wu meer uns auf den Geischd dun b`sinne,
will unser Lebe nei beginne-.
Die Lieb vun Christus werd in uns sich rege
will Herz und Gewisse in uns bewege-
Drum er zum gure Schluß unn End
sich Petrus an ehr Gerwisse wend`t
"Ehr Brierer unn Schwestre, kehrn doch um
unn gläwen em Evangelium."
Dreidausend Leite sind do in sich gange
henn ehr Lebe nei aag`fange,
weil Gott sein gurer Heil`ger Geischd
hot ehr Herz aus Stää erweicht.
Dief im Herz drin dun se spiere
Gott will uns so im Leewe fiehre,
daß es nit uhne Richdung muß treiwe
nit uhne Sinn unn Ziel muß bleiwe.-
Meecht doch auch bei uns so en helle Schei
so e Licht in uns aufgehe, ins Herz uns rei
Meecht doch bei uns der Geischd uns schenke,
daß mer nit an uns selber bloß denke,
Meecht so en Himmelsschdurm die Welt vewandle
e HimmelsKraft -aach durch unser Handle-
daß mer sich mieht um `s rechte Veschdehe
daß mer Schritte zum Friede hii gehe
Unn weern aach zaghaft noch sinn unn klää unser Tritte-
So sind es doch die viele Schritte-
vun viele Mensche an viele Orte ehr Handle-
wu es Gsicht vun de Erd dun vewandle-
`s braucht Mensche,wu es Heil nit suche in Waffe,
wu de Friede suche, Friede schaffe-
wu sich zum Gure lossen hiilenke-
wu aach an die Mensche denke
wu vezwiefelt misse kämpfe um ehr Recht
S geht doch so viele Mensche so schlecht
daß `s Uurecht grad sem Himmel schreit,
Gerechtigkät braucht unser Zeit-
Unn Mensche wu nit bloß denken an sich-
unn nit bloß machen große Sprich-
wu de Schöpfung se diene bleiwen beschdrebt-
in Ehrfurcht vebunne mit allem, was lebt.
Es mißten vun domols die Wunner nit sei
Hauptsach, der Gesichd kummt zu uns rei,
wu in uns wirkt e neies Veschdehe
daß mer die Weeche, wu gud sinn dun gehe
uns nit länger fer uns veschdecke
unn dun mit annre die Wohrhet entdecke
daß mer was recht esch nit länger veschweige
daß mer des suche, uns entdecke unn zeige
Wann so Jesu Geischd meecht wirkte fort-
heit unn bei jedem - an jedem Ort,
was kennt des fer e Pingschde sei?!-
So stimmt mit mir in die Bitt`drum ei:
"Du Geischd, wu Liebe esch, wu zu de Wohret uns lenkt,
so daß mer nit an sich sewer bloß denkt-
wu uns helft, recht unser Schritte se gehe
du Geischd vum Friede - wu klar uns helft sehe-
Kumm zu uns, ach kumm doch, du Geischd des Lebens-
Kumm aach zu uns, kumm nit vegebens"-