Gern du ich bei `me Kerchefeschd
bei soviel nette, liewe Gäschd
wann Kerch mer feiern fer junge unn alte
mei Preddicht in Pälzisch als gschdalte
-in unserer Sprooch, wu mol laut esch unn deftisch
unn dann wirrer zaart unn immer als kräftisch
zumal ich schun als kläner Bu`
vunn klän off Pälzisch babble du-
unn wann ich fer E`sem e Preddicht als dicht
dann nemm ich ganz gern als e Petrus- Geschicht,
De Petrus esch`s wu eier Wappebild ziert.
Drum, män ich, esch`s wert, daß mer studiert
was uns meecht fer unser Daache
so e Petrus-g`schicht uns saache.-
Heit wemmer drum heere e Petrusgeschicht,
wu vum Petrus uns bericht,
Wie en Spiechel kann se sei fer unser Leewe
in unserm Hoffe, Färchte, Streewe
e Spiechelbild fer unser Glääwe
fer des was uns traacht, uns Halt gebbt im Lewe
unn aach fer unser Zweifel, Bange
wann nit mer wissen, was aafange:
Wammer in Angschd vesinke misse
uns nimmi recht se helfe wisse-
so wie mer machmool saachen als:
es Wasser steht mer bis sem Hals
Nit wissen, was off uns zukummt - morche
vor lauter Kummer, lauder Sorche
Unn wer kennt des nit; mer mißt vesinke
in Kummer unn Elend gar ertrinke.-
Aach Petrus de wackere Fischersmann
wu gut mi`m Schiff sunschd umgehe kann
der war mit seine Freinde in großer Not,
hot gerufe in seim Fischerboot:
>Mer missen all vederwe
mer missen all minanner sterwe
Der Storm bringt unser Schiff zum Sinke.-
Mer missen all vegehe- ertrinke!
Es esch ke Hilf in unsrer Not,
als wie allä du, unser Gott<-
Dobei war doch sunschd er voll Waachemut,
der aach was Großes als waache dut.
So daß mer`n am liebschde meecht frooche?
"Dut - Petrus- dich so plooche
die Angschd, de Zweifel, de Kummer, die Not
die Angschd vorm Leewe unn vorm Doot?
So vezweifelt hoschd du gekrische.
Esch dein Glääwe so vun der gewiche,
daß dein Heilischeschein uns muß veblasse
unn du duschd ganz zu uns basse?
Bischd änner vun uns -wie unser Leit-
nit hoch erhaben iwwer die Zeit-
Bischd du wie meer- so menschlich- klää
dann stehn mer nit so ganz allää
wammer saacht sich manschmool als:
es Wasser steht mer bis zum Hals.
Wammer in Angschd vesinke misse-
wammer uns nimmi se helfe wisse-
Der Bor`m unner de Fieß esch wie weggezoche-
wammer -vum Lewe entdeischt- bedrooche-
de Kopp henn voll vun Kummer unn Sorche-
nit wissen was werd heit unn morche.-
Wann mer so uns fiehlen in unsrer Welt-
werd em hilfreich wie e Bild vor die Ääche hiigstellt
do die G`schicht aus alter Zeit
fer uns unn jetzt- fer jetzt unn heit:
damit mer nit denkt, mer mißt vesinke
unn gar im Elend noch ertrinke-
als weer nit Trostschd unn Hoffnung uns gewwe
als het nit en Sinn fer uns es Leewe:
Die G`schicht wu mer heern bei Matthäus heit-
will uns dann helfe durch so Zeit.-
im 14. Kabiddel dut se stehe-
wie jerer kann in de Biwwel drin sehe-
Die esch wie e treeeschdliches Bild-
Die zeigt uns die See- im Sturm- so wild
- zeigt uns de See Tiberias
- zeigt uns all die Jinger vor Schreck ganz blaß
Wie sinn die Welle so groß- unn sie selwer ganz klää
Sie sinn uhne Jesus unn drum ganz allää
Uhne Jesus allää in de Not?
Uhne sei Hilf, sei Kraft unn sein Root?
Die Jinger sinn doch sunschd als zu jerer Stund
mit Jesus samme in gemeinsamer Rund.-
Unn Jesus esch -trotz Gefahr- nit in ehrer Mitt`?
So war`s- Er hot an sie die Bitt:
als se mit de Leit noch samme ware:
Dun - ehr mei Freinde, ans annre Ufer schun fahre
- Ich kumm dann nooch- Gehn ehr voraus <
Ich schick derweil die Leit all nooch Haus
um die ich mich hebb gekimmert die ganz Zeit
Ständich sinn jo zu em kumme mit ehre Neet die Leit
De änt war traurich, de anner war nit gsund,
de dritt war ganz allän uffem Erdrund,
unn weer uhne de Jesus ganz vezweifelt gebliwwe
än vierte hot äbbes rumgedriwwe,
wu er käm` Mensch nit weit und breit
hot sage kenne die ganz Zei
Unn all die Leit mit ehre Sorge
hän enner gebraucht, bei dem mer geborge
sich wäß- en Mensch mit Herz
wu mitfiehlt beim annre seim Kummer unn Schmerz
wune zuheere kann, wammer `m vezehlt
was em bedrickt unn was em fehlt
wu em so dodebei lieb hot unn helfe dut
unn em fer´s Leewe schenkt gure Mut.
Unn Jesus hot ne g'holfe, de Leit
ne zugeheert - unn dann sich g`saacht - wie `s war an de Zeit
Ich loß se hääm gehe und geh jetzt fort
an en stille ruhige Ort.
Off en Berg dut er steige, um se bete
um in de Still vor Gott dort se trete.
---
Isch Jesus so ganz vun de Leit geschafft -
daß er im Gebet sucht nei sei Kraft?
Froocht Jesus dort sich in de Still,
was Gott jetzt vun em kinftisch will?
Dut er fer sei Freinde bitte
daß se dun sichre Schritte,
wann se aaficht e uusicher Zeit
im Strom vun de Sorche unn de Not vun de Leit?
Wann de Wind ne entgeeche dut stehe
unn ehr Glääwe droht unnersegehe
im Soog vun Angschd unn Hilflosigkäät,
weil die Stimmung vun de Mensche ganz geeche se steht
unn`s Schiff wu sich Gemeinde nennt
kä ruhige stille Zeite mäh kennt-
Wammer määnt Jesus wer weit weg unn zu groß die Not,
unn s geeb bloß Vewirrung und ken gure Rot?
Umgewwe sinn se vun seiner Bitt
aach wann se `n nit sehen in ehrer Mitt
---
Unn schließlich werd`s dunkel -unn immer noch dort
esch Jesus im Gebet an dem stille Ort
wu er war still von ne weggewiche
Das Boot mit de Jünger esch inzwische
- vun de Jinger wu uhne Jesus warn gebliwwe-
weit drauße auf dem See getriwwe.
En starke Wind der esch offkumme
unn hot ne allen Mut genumme
Wind unn Welle henn gege`s Schiffche gekracht
unn henn ne schwer se schaffe gemacht
Groß war ehr Not unn groß ehr Sorche
Die Nachd war ganz dunkel- `s war korz vorm Morge
Was schwankt unn schaukelt doch ehr Boot!
Wie sinn die Jinger so in Not
dabei sinn`s doch erfahrene Männer
Fischer unn Schiffer- so sicher wie känner
mit Wind unn Welle erfahre
henn getrotzt schun so manche Gefahre.-
Unn sie kreischen entsetzt in ehrer Not:
Vor Ääche isch uns unser Doot
Unser Leewe esch vebei- se End,
wann nit sich ball unser Schicksal wend`t
Unn wie se kreischen nooch Hilf in de Not
unn se sich wenden an ehrn Gott-
Do dun se mit ehre Ääche sehe,
wie Jesus offem Meer off se zu dut gehe
Doch alles bloß entsetzt do kreischd:
E Gschpenschd esch des - Des esch en Geischd
Dun Jesus nit erkenne-
ne nit beim Name nenne
-Um aus de Angschd se se wecke,
ruft Jesus ne zu: »Nit veschrecke!«
»Ich bin's, - henn kä Angst meh- bei eich am Boot!«
Zu End esch de Schrecke- zu End die Not.-
Do sagt de Petrus zu`m : »Ach, liewer Herr,
wann wirklich Du`s bischd, dann befehl doch meer,
ich sell off em Wasser zu der kumme!«
Wann du mich`s hääschd esch die Angschd mer g`numme
»Kumm!« sagt de Jesusdo zu`m unn im Nu
esch de Petrus aus em Schiff raus off Jesus zu.
Kaum hot er verlosse es schitzende Boot
unn er war offem Wasser - do iwwerkummt em die Not
Die hohe Welle hot eroff sich zukumme g`sehe
kann nimmi länger offrecht stehe
Er beginnt voll Angschd se sinke
-kreischd voll Angschd, er mißt ertrinke:
»Helf mer, Herr!« in seinre Not
»um mich esch nix als wie de Doot«.-
...
Sofort hot Jesus sei Hand ausg`schdreckt,
se hii zum Petrus ausgereckt
ne ergriffe, ne gefaßt am Arm
und zum g` sagt mit rer Stimm sanft unn warm:
»Du hoschd -wie de siehschd- noch nit gnung Vertraue!
Du doch ganz off mich traue unn baue
Warum glääbschd bloß mi`me halbem Herz?
Esch die Angschd so groß- dein Schmerz?
----
Unn er steigt mit em ins Boot
unn se End esch all die Not
und der Sturm der war se End
unn die Not, die war gewend`t
Unn wie am End war die große Not
sinn die Jünger dort im Boot
niedergschderzt vor Jesus voll Erschrecke
- s deet bei ne de Glääwe nei wecke:-
Sie wenn kinfdisch nit e bissel bloß glääwe
wenn ganz im Sinn vun Jesus leewe
Sie rufen: »Du bist werklich de Sohn vun Gott
Helfer unn Schutz in aller Not.«
Ach wann ich nichts spier vun deiner Lieb unn Macht
du fiehrschd mich zum Ziel aach dorch Dunkel unn Nacht
Des henn se gelernt- des henn se erfahre,
wann es Leewe nit dut die Not erspaare:
Isch unser Glääwe aach oft klää unn veborche
sinn greeßer de Kummer unn die Sorche-
so isch doch noch greeßer die Kraft vun Gott
Isch Helfer unn Schutz Er in aller Not
Er steht zu seim Wort, was er uns dut saache
Ich bin bei eich alle Daache.«
----
Drum -wann mer uns saachen als:
es Wasser steht mer bis zum Hals.
Wammer in Angschd vesinke misse-
wammer uns nimmi se helfe wisse-
Der Bor`m unner de Fieß esch wie weggezoche-
wammer -vum Lewe entdeischt- bedrooche-
de Kopp henn voll vun Kummer unn Sorche-
nit wissen was werd heit unn morche.-
Wann mer so uns fiehlen in unsrer Welt-
werd uns des Bild vor die Ääche hiigstellt-
des Bild aus alter, alter Zeit
unn helfe meecht uns jetzt unn heit:
damit mer nit denkt, mer mißt vesinke
unn gar im Elend noch ertrinke-
lernt, nit e bissel bloß glääwe
ganz im Sinn vun Jesus se leewe
weil Trostschd unn Hoffnung uns esch gewwe
Troschd wuu traacht dorchs ganze Leewe

Gute Nachricht: Matthäus 14,22-33