Ihr seid ein Brief Christi

Ihr seid ein Brief Christi...(2. Korinther 3,3)



Pingschde in Rhodt unner d` Keschdebääm!
Mer fiehlt sich do grad wie dehääm-
Do feiern mer mit unsre Gäschd`
jeed Johr beim Heimat- und Blierefeschd!

Unn weil Pingschde weit mäh esch als bloß `s Trinke unn`s Esse
aach wann `s so viel- so schnell - vegesse
esch des aach recht- nit iwwerzwerch.
daß do mer halten heit aach d` Kerch:
wu`s Worschd gebbt unn Weck - unn Fläschschbieß und Wei
-unn ladt Johr fer Johr dort zum Gottesdienschd ei.
En griene Dom dort uns all ve`eint.
Wie schä, wann aachdie Sunn uns scheint
Unn dort, wu de Wind loßt die Keschdebääm rausche,
dun off die biblische Botschaft mer lausche
E Wort vum Paulus off des wemmer uns b`sinne,
mit dem will mei Preddicht ich beginne:
aus seim zwette Brief an d` Chrischdeleit vun Korinth-
Damit des Wort in de Biwwel mer find:
saach ich, wu`s schdeht -ich sag `s eich glei`-
im dritte Kabbidel- es esch de Vers drei:
fimf Worte sinns bloß- fimf Worte- en Satz
unn des, was dodrin steckt esch wie en koschdbare Schatz:
unn des Wort esch wert, daß mer`s grindlich betraacht.
"Ihr seid ein Brief Christi"- hot d`Paulus dort g`saacht

En Brief- des ve`schdeht jerer- des werd jerer wisse-
Do werd mer nit lang was erkläre erschd misse:
En Brief- vumme Freind- weer des nit e Frääd,
wann als änner kumme deet?
So e gures Wort, des dut em gut,
des baut em off, des macht em Mut!
Unn wammer was hot falsch gemacht,
do g`heert em aach mool die Määnung g`saacht
unn vielleicht steht aach drin: ich lad dich ei,
kumm zu mer off en Schoppe Wei:
Mit meim Freind, meim gure, alte,
meecht ich mich mool wirrer unnerhalte
iwwer sell unn jenes - ich braucht mool dein Root.
So en Brief esch netisch, wie e Stick Brot
unn weers aach e I-Mejl vum Indernett
wu vun weit her vielleicht als kumme deet
Doch ehr Leit, ich mach kä Sprich-
ich sach es grad so wie es esch:
Bei mir esch oft de Briefkaschde voll
mit Lumpekram- s´esch manchmool zu doll:
nit bloß mit Dienschdposchd- des weer jo aach richtig
Debei esch -vielleicht mochmool- mool werklich was wichtig-
nää Lumbezeich esch`s- grad zem verreiße-
Reklamekram fer wegzeschmeiße
Vun Unnerhosse, Mikrophone
Kinnerschaukle, Grammophone
Ausflugsfahrte- lange Messer
Lotterie - es werd nit besser
Ich schmeiß es glei zum Altbabier!
vun Doseflääsch unn Dosebier
vun Panschelwei aus fremme Länner
als geebs bei uns nit en gure Drammänner
unn`n gure Rießling fer de Dorschd
Unn als hett nit unser`n Kaiser- Metzger e bess`ri Worschd

Deet ich alles eich offzehle,
deet ich eich unn mich bis morche noch queele:

Korz: ich hebb mer schließlich g`saacht:
Do gheert endlich was gemacht!
Unn ich hoff mer, daß des klappt:
En Zettel werd groß off de Briefkaschde gebabbt!
"Kään Werbungskram mäh in de Kaschde neischmeiße!
Ich lees es doch nit, du`s verreiße!"

Doch trotzdem- so saach ich- um ehrlich ze sei:
En g`scheide/ gure Brief esch ganz selten debei!

"Warum der Parre so lang unn bräät
iwwer d`Poschd vezehle deet?"-
Des werd sich mancher im Stille jetzt froche-
Die Neigier sell eich nit lang plooche:
Ich will, daß jerer deitlich kann sehe:
Off des, was in so `m Brief dut stehe,
-was so`n Brief der saache kann-.
Off de Inhalt, off den kummt`s an.

Unn wann vun de Gemää mer bei Paulus leest
daß er en Chrischdusbrief se hääßt
- daß also bei jerem- in Wort unn Wese
`was vun Chrischdus weer ze leese
dann mänt`s so`n Brief- so needisch, wie e Stick Brot
mimme gud Wort- em gure Root.
Der wu em offbaut unn macht em Mut
-weil so e gud Wort, des dut em gut-
unn nit so Reklamezeich grad zem Verreiße
gut fer zum Altbabier ze schmeiße:
 
En Brief vun Chrischdus ferd`Mensche gschriwwe
En Brief, wu zeicht, wie Gott esch: voll` Liewe
E schäänes Bild- en gures Wort
fer uns als Chrischde- bei uns am Ort,
Ja so e Bildwort, macht em Mut
des dut em werklich in de Seel drin gut
unn`s will aach unser Herz erreiche!
Unn doch: setzt `s nit aach Froochezeiche?

Sinn mer des werklich- uhne Zweifel?
- meer Chrischde in d` Welt- des klänne Heifel?
Esch werklich bei unserm Wort unn Wese
die Chrischdusbotschaft abzeleese?
- daß mer in Lieb sinn aagenumme?
-daß jerer- wie er esch zu Gott derf kumme?
- unn daß mer - so wie Gott uns liebt-
die Neigschdelieb am annre iebt?
- daß mer`d Schepfung, die bedroht`, bewahrt-
mit seine Kräft debei nit spaart-
in unserer Welt voll großer Sprich,
wu soviel denken bloß an sich-
nit bloß nooch dem froocht, was em nitzt-
froocht nooch em annre, wie mer`n stitzt?
schafft, daß die Gerechtigkäät
weer stärker als die Schlechtigkäät?
unn daß mer Schritte zum Friede hii waache
unn Friede in unsre Herze drin traache?-

En Liewesbrief meer, wu Gott selwer schreibt,
weil er mit seinre Menschhäät vebunde bleibt?
En Brief meer vun Chrischdus, in dem mer lääst,
was Menschlichkäät dut, was Hoffnung hääßt?
was Glaawe määnt unn was es Liewe,
wu mer sell dach-däglich iewe?

Deet wer des saache vun uns- weer der nit en Schmeichler?
unn weern mer droff stolz gar- weern do mer nit Heichler?
Weil: e gschriwwenes Evangelium uns ze hääße
in dem mer Gott sei Wort kennt leese
voll gurer Nochrichte- wie`s Leewe gelingt
voll gurem Wort, wu em weirer bringt
uuvefälscht unn uhne Zweifel
So was nemmt uns ab kän Deifel-
Esch doo nit oft aach annres se leese,
was mer beim beschde Wille nit Evangelium derf häße?
nit gure Botschaft, wu Gures bedeit?
- nit gure Noochricht, wu befreit?
 
Es esch doch nit alles e wahri Frääd-
Neewe Giet unn Menschlichkäät
wer`n sichtbar doch aach oft menschliche Schwäche
unn nit bloß Stärke -aach Gebreche.

`n Liewesbrief wu Gott selwer schreibt,
weil er mit seinre Menschhäät vebunde bleibt?
Ich kann veschdehe, meecht änner de Paulus beneide-
um so re Gemää unn um so gold`ne Zeite:
Wann er sei Gemää so en Chrischdus-Brief hääßt,
in dem mer deitlich die gure Nochricht leest.

"Ach, was muß des gewest sei e glickliche Zeit!"-
Doch- was denken ehr, ehr Leit?
Wammer dem Paulus sein Brief genau mool lest,
esch`s ganz annerschder gewest:
`s warn Mensche dort grad wie du unn ich
unn alles annre weern bloß Schbrich:

Menschlich - allzumenschlich esch`s zugange dort
grad so wie heit bei uns am Ort.
Spannunge warn dort- Kunflikte, viel Streit
unn g`rad nit e "heilische" Zeit
Im Geechedääl, mer hot sich g`schdritte
-unn mancher drunner hot schwer gelitte:
wie Zwietracht do war statt Äänichkäät
Eichesinn -statt Menschlichkäät-
Unn manchmool- nit annerschd als bei uns im Land
fehlts an Root unn an Ve`schdand
Unn in de Gemää dort esch g`west so e manchi Grupp
wu do fer sich hii kocht ehr eichni Supp
Unn fer sich in aller Schdill
macht grad en jerer was er will-
unn will dovor noch groß Applaus.
Was mer do heert, esch grad en Graus,
Mer dut sich bekämpfe- unn dut uufair schdreite-
so eschs- so wars - so sinn die Zeite!-

Aach de Paulus hot im Grund dodrunner gelitte:
Da warn sogar Leit g´west, die henn gar b`schdritte,
daß er en richtige Aposchdel weer!
Unn grad so Schwollkepp, die finnen noch G`heer.
Vun auswärts sinn die schdolz herkumme
henn imboniert, henn Ei`fluß g´numme:
Wichtigmacher, mit große Schbrich.
Unn die henn groß berufe sich
off ehr Babiere: Empfehlungsschreiwe,
dun e großes Weese treiwe,
unn vewerren die Gemää-
machen sich bräät- machen d` Paulus ganz klää,
Was de Paulus wunnerschd weer?
unn se finnen mit Geheer:

De Aposchdel? Nix als en kranker Mann,
wu im Grund nix bringe kann!
Nit dynamisch -jung! zu alt!
Aach gar kä imbosanti Gschdalt!
Stark weer der doch bloß im Briefe-Schreiwe!
Im Grund kennt der em grad gschdoole bleiwe!
Paulus- en Aposchdel -gsand vun Gott?
e Witzfigur weer der -en Schbott!!
Unn wer hett gfresse am en Narre
der zeicht: dem fehlt grad aach en Schbarre:
Be `ne selwer, do weer als richtig was los!
Unn sie weern wichtig unn richtig unn werklich groß!
Do weer Begeischdrung - do weers imbosant!
Do weer was los im ganze Land!
Do ging die Poschd ab- unn des weer doll!
Vun Gott seim Geischd- do weern se voll-
De Paulus, den kennt mer vegesse! Der weer schließlich aach fort
-weer jetzert an em annre Ort.
Awwer sie weern jetzt do unn deten aach bleiwe
unn hetten aach all ehr Empfehlungschreiwe

Doch was macht de Paulus in so rer Zeit
bei so em Haufe vequerte Leit?
De Aposchdel, wu mer so mißacht als hot
an dem mer hot nix als sein Schbott?
Mi`me Heilisch-Dunnerwerrer
geht er degeeche unn dewerrer:
Damit nit d`Uuvenunft reegiert
unn d` Uugeischd am End noch thriumphiert,
dreht der de Schbieß grad ääfach um:
De Paulus, der esch nit grad dumm!
Der sacht ne all- bei meiner Ehr!-
mei Empfehlungschreiwe- des sinn ehr:
Unn helft so de Mensche klar ze sehe
wie er so dut de Schbieß umdrehe:
Unn so saacht er -trotz allem Schbott-
ehr, ehr sinn en Brief vun Gott:
ehr Chrischdemensche vun Korinth
-unn wu sunschd mer noch se find,
wann en Mensch beim Glääwe bleibt:
En Brief wu Gott in`d Herze schreibt
"Wann annre protzen mit Empfehlungschreiwe
so sell unn muß es dodebei bleiwe:
Ehr sinn en Brief, wu Gott selwer schreibt
in d`Mensche ehr Herz nei, wu Gott sein Geischd treibt.
Aach wann so manches mich dut queele:
off eich du ich mich berufe- unn kann empfehle
nit eier Qualitäte unn eiern Ruhm
awwer mit eich es Chrischdedum."

Unn ich denk mer do esch mancher zammegezuckt,
wu`s vorher hot in de Ohre gejuckt
unn mancher geht in sich- unn esch betroffe
sieht die Wohret vor sich offe
wann mit viel Lieb unn Fantasie
de Paulus um sei Gemää kämpft - Mit Ironie,
dut er sogar selwer sich jetzert empfehle
grad z`lääd mit dem, was ne dut queele-
Er sprecht ganz offe vun seine Schwäche
nennt aach sei gsundhätliche Gebreche:
Ewe kän Superaposchdel- en Mensch will er sei
bei dem Gott sein Geischd ins Herz kann nei,
sein Geischd, wu`s Leewe kann ve`wannle:
Unn in Seim Geischd do will er hannle-
als schlichter Mensch en Mensch fer Gott
unn will so sei -trotz allem Spott-
sei Werkzeich unn sein Mitarbeiter
e Hilf fer die Mensche- fer all die en Schdreiter,
wu um eehr Leewe mer beliecht
unn um ehr Lewensglick betriecht,
Wann Mensche mer gängelt- um ehr Freiheit se bringt:
e Hilf, daß `s Lewe recht gelingt.

So kummts, daß bei sich er riehmt die Schwäche
die Schwierigkääte- die Gebreche
all des was er so als -alle Gebott-
als Schdreiter fers Evangelium erfahre hot:
wie er mool war ei`gschberrt in e finschder Loch,
wie mern veschlache hot- noch unn noch
weil er fer die gure Botschaft hot gschdritte.
E paarmool hett er Schiffbruch erlitte
off große Reise, wu beschweerlich
unn werklich nit so uugefehrlich
um die gut Botschaft weirer ze traache
wu er in aller Welt will saache
des Wort vun Chrischdus, wu esch es Heere wert-
aach zu d` Mensche, wu noch nix vum henn geheert
-nit `s Wort vun Gott unn von Chrischdus, seim Sohn
wu wie`n Schatz esch, veborche imme G`fäß drin aus Ton
es Wort vum Friede- de Ve`sehnung im Schdreite
gut fer jetzt unn alle Zeite,
weil es Leewe sich kann wannle
wann Mensche im Sinn vun Jesus hannle-

Wer glaabwerdisch lebt- ind`Hoffnung- voll Liewe
der esch so en Brief- vun Chrischdus gschriwwe
En Chrischdusbrief sinn so Mensche fer alle Leit
in gurer wie in schlimmer Zeit:
Aach wann se bleiwen voll Fehler unn Schwäche
unn so mancherlei Gebreche,
esch doch dief in ehr Herz nei gschriwwe
wie Gott dut all die Mensche liewe
Ach weer`s so bei uns -in unsre Zeit, heit!
daß bei uns mer kennt -fer alle Leit
in unserm Herz drin die Botschaft fenne,
bei uns -bei uns Chrischde- se deitlich erkenne:
unn weern`n wie`n Brief, wu lesbar bleibt
Botschaft vum Herr-Gott, wu selwer er schreibt

Ach, weern mer wie so`n Brief, wu werklich macht Mut
Vun dem mer sich sacht: Der du mer gut-
den meecht off Ehr ich unn Gewisse
werklich gar nimmi vemisse!
Kän Brief, wu mer schmeißt fort ins Eck,
wu halt zum Abfall gheert - zum Dreck,
weil d` gnung vun`d Wichtigmacher hoschd-
wu d` grad vegesse kannschd getroschd
Botschaft vun Gott in die Herze nei gschriwwe
wie en Brief an die Mensche, wu wichtig gebliwwe
nit bloß esch in d`Ve`gangenheit
wichtig fer jetzt unn alle Zeit
unn so off dere geschundne Erd
enner em annre zum Seeche werd.

Daß Chrischdeleit en Seeche sinn,
war`s Thema beim Ökumenisch` Kerchedaach - letzschd in Berlin,
orrer besser gsacht: daß mer`n sei selln: en Seeche
minanner off de Such` nooch gure Weeche.
Wann doch Gott mit sein Geischd uns dozu deet lenke!
Meecht Er mit seim Geischd uns all doch b`schenke!
Wie deet do die Welt sich zum Gure hii wannle
dann aach dorch uns unn unser Hannle!
Daß des bei uns so geschehe deet
esch unser Wunsch unn drum unser Gebet:

"Unser Gott, sei doch so gut,
Schenk dein Geischd uns, Weishäät, Mut
-aach wann`s uns im Leewe mool nit so g´fallt,
Schenk uns im Glaawe en feschde Halt

Schenk Hoffnung uns, wu zem gure Ziel fiehrt
wu nit im Dunkle sich ve`liert

Schenk uns viel Kraft fer unser Liewe-
daß mer Lieb` am annre iewe
Schenk uns de Mut, es Rechte ze waache
- es rechte Wort zud` recht Zeit ze saache-
unn Händ, wu vezeih`n, wu mer`m annre hiireiche
unn setzen geeche de Haß e Friedenszeiche

Schenk uns Aache fer die Nadur
fer alles was lebt in Feld, Wald unn Flur,
daß nit mer ze`steern, was uns esch geborgt-
daß mer`d Schepfung heegt, pfleecht unn umsorgt!
Schenkt Ruh uns, wu mer so oft hetzen unn renne!
Helf uns off die Spring, daß mer Pause uns genne!
Unn schenk uns aach Grund bei so manche Sache
vum Herz raus kräfdisch mool ze lache!
Humor schenk uns, weil`s Lache befreit
so wie `s halt esch seit alder Zeit

Vor allem gebb Du, Gott, Dein Seeche
an dem alles esch geleeche
daß mer`s Leewe vom Aanfang bis End
wissen bei deer, Gott, in liewende Händ
Unser Gott sei doch so gut:
Schenk dein Geischd uns, Weishäät, Mut!-
So sell es sei - in Jesus seim Name(n)
So sell es sei - Amen. Amen.
 

TOP