Vum Schiff, wu sich Gemeinde nennt
nooch Matthäus 8




Ich hebb- ehr Leit, so vor zwää Woche
e Preddicht in Pälzisch eich vesproche
wu zu unserm Textwort baßt
unn des alles in Reime faßt.
So du mer heit heere e Geschicht zum Boot
vun de Jinger -mi`m Petrus- in ehre Not.
Wie en Spiechel will die sei fer unser Leewe
in unserm Sorche, Hoffe, Streewe
e Spiechelbild fer unser Glääwe
-fer des, was uns traacht, unn uns Halt gebbt im Lewe
unn aach wann uns de Zweifel ploocht
unn vegeblich nooch em Sinn mer im Leewe sich froocht:
Wammer in Angschd so vesinke misse
uns nimmi recht se helfe wisse-
Unn mer saacht sich so machmool als:
es Wasser steht mer bis sem Hals!
Vor lauter Kummer, Bange, Sorche
froocht mer sich: Was kummt heit- morche??

Mer heern wie de Petrus de in großer Not,
hot gerufe mit de Freinde in seim Fischerboot:
»Mer missen -HerrGott!- all vederwe!
Mer missen all minanner schderwe!
Der Storm bringt unser Schiff sem Sinke-
Vegehe missen mer- ertrinke!
Es esch ke Hilf in unsrer Not,
als wie allä du, unser Gott!«

Debei war der sunschd als voll Waachemut,
unn Großes er als waache dut.
Unn`s warn doch all wackre Fischersleit
voll Mut- beherzt se jerer Zeit!

Mer meecht`n grad am liebschde frooche:
"Dut -liewer Petrus- dich so plooche
die Angschd, de Zweifel, de Kummer, die Not
die Angschd vorm Leewe unn vorm Doot?
So vezweifelt hoschd du do gekrische.
Esch dein Glääwe so ganz vun der gewiche,
Bischd änner vun uns -wie unser Leit-
nit hoch erhabe iwwer die Zeit-
Bischd so wie meer- so menschlich- klää?!
Dann stehn aach mer nit ganz allää
wammer saacht sich so manchmool als:
» Es Wasser steht mer bis zum Hals.«
Wammer in Angschd vesinke misse-
unn uns nimmi se helfe wisse-
wann -vum Lewe entdeischt- bedrooche-
uns de Bor`m unner de Fieß esch wie weggezoche-
mer de Kopp henn voll vun Kummer unn Sorche-
nit weirer wissen fer heit unn morche.-

Wann mer so uns fiehlen in unsrer Welt-
werd uns hilfreich vor die Ääche hiig`schdellt
do die G`schicht aus alter Zeit
fer uns unn jetzt- fer jetzt unn heit:
damit mer nit denkt, mer mißt vesinke
unn gar im Elend noch ertrinke-
als weer nit Trostschd unn Hoffnung uns gewwe
als hett nit en Sinn fer uns es Leewe:

Die G`schicht, wu mer heern bei Matthäus heit-
will uns dann helfe durch so e Zeit.-
Im 8. Kabiddel dut die stehe-
wie jerer kann in de Biwwel drin sehe-
Se esch wie e hilfreich, treeschdliches Bild-
Die zeigt uns die See- im Sturm- so wild
- zeigt uns de See Tiberias
- zeigt uns die Jinger -vor Schreck - all ganz blaß!
Wie sinn die Welle so groß- unn se selwer ganz klää!
Unn Jesus, der schlooft- unn loßt se allää ???

Mit Jesus - unn doch allää in de Not?
Uhne sei Hilf, sei Kraft unn sein Root?
Mit Jesus -unn doch in großer Not,
Ve`wirrung - kä Hilf- ken gure Rot?
En starke Wind esch pletzlich offkumme
unn hot ne allen Mut genumme
Wind unn Welle henn geche`s Schiffche gekracht
unn des hot ne all schwer se schaffe gemacht:
Wie dut de Wind ne entgeeche schdehe
unn ehr Glääwe, wie droht der unnersegehe
im Soog vun Angschd unn Hilflosigkäät,
wu so manches iwwer die Kräft`als geht
unn`s "Schiff, wu sich Gemeinde" nennt,
kä ruhig - schdille Zeit mäh kennt-
So war es schun vor alder Zeit
unn nit erschd jetzt unn nit erschd heit:
Daß em manchmool de Zweifel ploocht
unn mer sich froocht unn froocht unn frocht:
ob des Schiff mit Frää unn Mann
noch sei Ziel erreiche kann?
Werd`s sein Kampf mit de Welle bestehe?
Werd `s Schiffche am End unnergehe?
Uhne Hilf unn Kraft unn Root?
Mit Jesus - unn doch allää in Not?
Ob die Mannschaft sammesteht,
daß es Schiff nit unnergeht?

Was schwankt unn schaukelt doch ehr Boot!
Wie sinn die Jinger so in Not
Debei sinn`s doch erfahrene Männer
Fischer unn Schiffer- Meereskenner
Getrotzt henn se schun so manche Gefahre!
Bei Wind unn Welle sinn se erfahre!
Unn doch kreischen se all jetzt- entsetzt in Not:
»Vor Ääche esch uns unser Doot
Unser Leewe esch vebei- se End,
wann känner unser Schicksal wend`t.«
Unn wie se rufen nooch Hilf zu Gott
unn se wachritteln ehr`n Jesus in ehrer Not!
Um aus de Angschd se all se wecke,
ruft Jesus ne zu: »Nit länger veschrecke!«
hot geeche Wind unn Welle sei Hand ausg`schdreckt,
se freindlich hii zum Petrus -zu de Jinger- ausg`reckt:
»Hänner all so wennig Vertraue?!
Du doch ganz off mich traue unn baue!
Was glääbschde bloß mi`me halwe Herz?
Esch die Angschd so groß- dein Schmerz?
Unn wie Jesus Wind unn Welle bedroht
esch se End die Angschd, ehr Not
De Sturm, der schrecklich, war se End
unn die Not, die war gewend`t
Unn wie se End war die groß Not
bei de Jinger dort im Boot
unn se End war ehr Erschrecke
- dut`s bei ne ganz nei de Glääwe wecke:
Nit bloß e bissel wenn kinfdisch se glääwe:
Se wenn ganz im Sinn vun Jesus leewe
»Wann Wind unn Welle dem Jesus gehorche
Do simmer beim alle Zeit geborche.
Er sell uns leite, lenke unn fiehre
Aach wann mer -so manches Mool nix spiere
vun seinre Lieb unn seinre Macht
bringt Er uns ans Ziel aach dorch Dunkel unn Nacht«

Des henn se gelernt- des henn se erfahre,
»Dut em aach`s Leewe die Not nit erspaare-
esch unser Glääwe aach oft klää unn ve`borche
sinn greeßer als der de Kummer - die Sorche:
So esch doch noch greeßer die Kraft vun Gott
- esch Helfer unn Schutz Er in aller Not
Er steht zu seim Wort, was er uns dut saache
Ich bin bei eich alle Daache.«

----


Drum -wann mer uns saachen als:
es Wasser steht mer bis zum Hals.
Wammer in Angschd vesinke misse-
wammer uns nimmi se helfe wisse-
Wann so mer uns fiehlen in unsrer Welt-
esch uns des wie e Bild vor die Ääche hiigstellt-
Des Bild aus alder, alder Zeit
des meecht uns helfe jetzt unn heit:
Du muscht nit denke, du mischd ve`sinke
unn gar im Elend noch ertrinke-
lern nei, im Sinn vun Jesus se leewe
unn nit bloß e bissel fer dich so se glääwe
weil Troschd unn Hoffnung in IHM uns esch gewwe
unn Kraft, wu traacht dorchs ganze Leewe

TOP