Vun Reewesaft unn Leewenskraft/
quer durch die Biwwel






Ehr Leit, ich will eich heit mol vezehle
wie mich seit Johr unn Dasch dut queele:
-unn s geht mer gar nit aus de Sinne
wie mer kennt beßre Weeche finne,
die biblisch Botschaft so ze sache
unn drum die Preddicht so se mache,
daß jeder 's hert- unn all die Frooche
womit die Mensche sich als plooche
wu mer so hot werrn ernst genumme
daß iwwerhaupt die Leit ach kumme'
Unn deshalb will ich heit prowiere
was käner gelernt hot beim Studiere:
ich will, weil ich als Pälzer Bu'
von Klä uff Pälzisch babble du
-wie ehr- ä Pälzisch Preddischd mache
ze Gottes Ehr sei Wort off Pälzisch sache
Ich wäß: des Pälzisch esch nit leicht -
fer Fremme nit- unn wie mer deicht
dut jeder ä bissel annerschd schwätze
die Mundart, wu mer dun so schätze:
Der sacht: Ich häb', hunn, habb- unn huschdes gesieh
der: hoschdes gsäne- grad wie hie:
Grad wu er herkummt- aus dere Ecke.
Sei Herkunft kann halt käner vestecke.
Im dicke, dicke Biwwelbuch
war ich letschd Zeit off de Such:
wu ich vum Weistock seiner Kraft,
vun Wingert unn vun Rewesaft -
korzum: vum Weibau - was det des finne,
wu helfe kennt uns, nochsesinne
iwwer uns selwer unn unser Lewe
unn des, wunoch meer sellten streewe
Do häb ich gsucht, ehr liewe Leit,
glei off de allererschde Seit
Doch steht bloß zwische d' Zeile drin
was ich gsucht häb in meim Sinn,
.
Unn s esch jo wohr: Wann Planz unn Kraut
off dere Erd werd aagebaut,
weil Gott,de Herr alles hot erschaffe
als gure Gab fer Mensch unn Affe
unn fer alles wu oftm Erdborm kriecht
unn was in de Luft unn am Himmel fliecht,
dann sinn bestimmt gewest debei
de Rebstock unn demit de Wei
Ich guck glei noch- Kabbiddel zwä
Vielleicht dut dort aach ewwes stehe?
Do esch die Redd vum Lewensbääm
-vun All-Erkenntnis , wie in d'Trääm
wie alles in de Griff ze krieche
weer dem Mensch sei greeschd Vegnieche
aach Gut unn Bees- unn wie die Schlang
des Weib vefiehrt- Die braucht nit lang
um noch de Frucht- de vebotne- se greife,
wu sieß do in de Sunn dut reife.
Unn jeder Mensch in unserm Land
jerer Pälzer mit Herz unn Vestand
en jeder wu sei Biwwel lest:
saacht: Än Äppelbam esch's bstimmt nit g'west!
Kän Pälzer kann so`n Kram sich denke!
Mer dut halt zeviel Gläwe schenke
de Gelehrte, wu nix als wie Ladein gekennt:
die hän d`Paradiesfrucht "Äbbel" gnennt:
Weil Äbbel schlicht dut "malum" häße
unn "malum" häßt aach "schlecht" unn "böße'
unn "malum malum" dann mißt sei
"än Äbbel, wu de Worm esch nei"
Doch wäs e jeres Pälzer Kend:
beid' Reemer doch kä Paradies mer fend!
weils in de Palz, bei uns gewese
wie jerer bei Pail Münch kann lese
in seiner Pälzisch Weltgeschicht,
wu er vor 80 Johr gedicht.
Es Paradies war in de Palz
so erscheint mer`s jedenfalls:
Do wachsen Äppel, Beere, Keschde
-de Wei geroot offs allerbeschde-
do wachsen die schänste Kerschebääm-
schänner als in de beste Trääm
Erbse, Bohne, Sparchle, Wersching,
Quetsche, Feige, Mannle, Persching
Die Bääm sinn dick all- groß unn bräät
unn alles vun prima Qualidäd
Fricht, so sieß die dun dort reife
so daß mer grad meecht denooch greife
Des esch des Land mit große Wälder
des esch e Land mit bunte Felder
Dort leewen Mensche voll Schwung unn Kraft
dort steht es Leewe voll im Saft
Drum, ehr Leit, so glääb ich als:
`s Paradies war in de Palz.-
Mer kanns noch heit erahne, vekoschde
dort war `s geheime Land im Oschde
Unn die Mitt vun de Palz- des esch bekannt
fer alle gscheide Leit im Land:
des kann bloß Rhodt unner de Rietburch sei!
Do wachsen Keschde- do wachst de Wei.
Unn ich gläb faschd: De "Bäm, wu Leewe"
des warn dicker, dicker Stamm vun Rewe!
Obs än Tramänner esch gewest?
So wie mern heit noch zeigt de Gäst,
des wäs ich leider nit ze saache,
weil s aus esch mit d' Paradiesesdache.
Doch : Lewerskraft
im Rewesaft
Im Saft der Rewe
Kraft zem Lewe
In vite vita
sic est ita
des hot der Noah schun entdeckt,
Der hot als erschder Rewe gschdeckt.
Weil em de Wei macht gure Mut
unn weil er ihm ach schmecke dut.
`s war iwwerstanne die große Flut,
wu`s Land ve`wieschd hot mit großer Wut
unn de`Reegeboche g`schdanne esch
als wer mer noch im Paradies
Got hto sein Booche an die Wolke hiigsetzt,
daß sich en jerer draa ergetzt
unn wäß: des esch des Friedenszeiche
mit dem er will unser Herz erreiche
Gott hot fer`d Noah Friede macht
unn fer die ganz, ganz Menschäät saacht:
sellt werre Froschd unn Hitzesglut
so lang die Erd noch schdehe dut.
's sell Friede sei in Stadt unn Land
unn wannem die Mensche machen Schand
sell trotzdem unser gure Erd
nit nochemol werre so zesteert
Drum hot de Noah, dabber, glei
de Rebstock gsetzt- unn wegem Wei
"de Treeschder" mer de Noah nennt
wie jerer wäß, wu sei Biwwel kennt.
Unn Troschd er manchmol brauche kann:
er esch än arch geplochter Mann.
Er schafft sich bucklich, lahm unn krumm -
die Zeit vum Paradies esch rum
Er esch mied gschafft unn ramponiert,
sei Nerve werrn arch schdrapeziert.
Doch owends dut er dann mit Keppche
sich genne als a gures Dreppche
-nit saufe wie des Vieh im Stall
sein Rhodter Piff off ämol all
unn nippt, genießt- schmeckt mit Veschdand
de beschde Wei im ganze Land.
Doch will ich eich aach nit veschweige,
daß Biwwel uns dut noch was annres zeiche:
Wied` Noah moll war so besoffe,
daß er ind`Wingert esch geloffe
unn weil`s em so häß war- uugeloche-
sich schblitternackisch ausgezoche
Unn wie sein Sohn, de Ham, ne hot gsucht-
hot der datsächlich sein Sohn gar ve`flucht,
wie der voll Schadefrääd ne hot gefunne-
in seine menschlich- schwache Stunne
So sinn die Mensche- mer schittelt de Kopp
Begreifts nit, was fer`n armer Dropp
en Menschekind werd wann setzt aus sein Ve`schdand
domols unn heit- auch in unserm Land
So esch`s: wu viel Licht esch- des wäß mer im Land
esch aach viel Schatte- Unn aach des esch bekannt
daß do im Vollrausch sein Noochfahr de Lot
sei eichne Dechter gschwängert hot.
Sie hän halt sunschd kän Mann gefunne;
Draus esch des Volk vun Moab kumme:
ä ferchderliches Volk -mit Getze,
fer die se gern ihr Messer wetze!
Fer uns als waarnend Beispiel gewwe,
wie's Saufe ruiniert monch Lewe.
Schun moncher vesoff hot uhne Sinn unn Veschdand
sei Lewwer, sei Milz, Hern- Haus, Hof unn Land
Desweche esch mol de Jesaja geloffe
zu dene, wu schun frieh-morchens hän g`soffe
unn hot ne mol grindlich die Mänung gesacht,
weil ständisch se hän ehrn Rausch gehatt
On die Familie denken se nit
wann se vesaufen Haus unn Bett
unn an die Mensche, wu in Not
unn dene 's fehlt om dägliche Brot!
's esch freilich gut vunnem unn recht,
daß er nit ach all die macht schlecht,
wu gern ä gures Dreppel drinke
wanns Owend werd- unn s äm dut stinke
was em es Leewe dut vedrieße
unn dut sein Wei ganz still genieße.
Doch manchi Frää unn mancher Mann
wus Trinke gar nit losse kann,
esch krank-unn muß sich helfe losse
-do helfen aach kä Sprich, kä Bosse.
Do g'heert de Dokter her- do braucht mer ä Kur!
Unn statt Wei bloß Wasser- Schbrudel pur!
s gebbt aach fer ihn noch Kraft vun Rewe
de Saft bloß uuvegore ewwe.
Doch wer des dorchhalt: bloß noch Saft,
des esch än Mann -all Achtung! orrer ä Frä- mit Kraft!
Korz: de Jesaja, der hots ne gsaacht,
was moncher gar nit gut vetraacht.
Die Leit hän grad beim Weifeschd g`sesse -
zum sechste Schobbe ehr Rumstick gesse,
do hot er sich sei Gitarr gschnappt
se gonz schnell gschdimmt- s hot gut geklappt!
E luschdigs Liedel hot er g`sunge
vum Weiberg- unn des hot geklunge!
Vum beschde Freind wellt er vezehle
Der det sich arch im Wingert quele
Des wer än schäne Wingert dort
ä guri Lag- ä siffisichi Sort
ä Wingertshaisel drin- gonz schneidich
-so daß mer grad kennt werre neidisch!
Bloß deet der Wingert gar nit trache!
Ehr Leit, s weer äfach zem Vezache!
s weer jede Mieh grad fer die Katz!
Unn dobei weers sei greeschder Schatz!
Umsunschd det er so schwer sich quele
unn iwwerall det mer vezehle
wie ne sein Schatz so arch entdeischd
unn daß er saacht: Ehr Leit- es reicht!
Im Bauch häb ich ä stinkischi Wut
Mit meim Wingert- des werd nimmi gut!
Fer mich sell sich de Ärger wende!
Schluß esch mim Wingert- jetzt esch Ende!
Des war ä scheenes, luschdich Lied!
De Inhalt traurisch, wie mer sieht.
Trotzdem, die Leit, die sachen: "Doll!"
unn klatschen feschd- des Lobes voll.
De Bänkelsänger-so sachen se- der aam Dropp,
der hot ä ganz anner Schätzel im Kopp:
Sie merkens, denken`s sich unn saache
Sei "Wingert" dut Zepp unn Kettcher traache -
unn Ring- unn än Rock: ä Weibstick dut ne plooche
unn dut nit groß noch ehrm Liebhaber frooche
Statt Lieb unn Luschd unn Lewensfräd
gebbts Stunk unn Krach unn Herzeläd
se esch wie beim Nochber halt en Drache,
den wu geschdern hot sei Frää veschlache
Doch als se grad beim Grinse sinn:
die Bawett, de Hannes unn aach die Kinn:
do dut de Sänger, de Jesajahu sich korz b`sinne
unn dut en neie Vers beginne
Mei Freind, wus werklich mänt so gut,
wu mer so arch entdaische dut
der Freind esch Gott- de Herr vun de Welt!
Unn der hot mich do her gestellt.
Ich sell eich sage, was ner selle
ze heere krieche, ob ners welle
odder nit- des esch ganz gleich
Um Gott geht`s jetzt unn ums Himmelreich!
Um des, was gut esch unn was echt,
was recht esch unn nit fies unn schlecht!
Desweeche häb ich mei Lied eich gsaacht
an dem ner so viel Spaß hän ghat!
Ehr, die ner am liebschde den deten veschlache
wus waacht eich ins Gsicht die Wohret ze saache.
Unn eich hot Gott sich gnumme zum Schatz!
Unn sei Mieh, wie beim Weiberg -esch grad fer d` Katz!
Wu er off Gut-Tat noch hoffe dut,
bloß Blut-Tat mer find- unn off die Schnut
unn iwwers Ohr haut doch jeder Mann
sein liewe Neechschde, wu er kann!
Gott hofft off die Gerechtigkeit
Do bei eich kummt Schlechtigkeit!
Unn sei Geduld esch ball am End'!
Er `n bessre Wingert sich leischde kennt!
 
Ob mer dut do in sich gehe
unn sein Fehler dut eisehe?
Aach wann`s manchem macht Vedruß:
Des bleibt offe bis zem Schluß
Ich will aach nit lang beim Jesaja veweile-
sunschd dut uns die Zeit zu ar`sch enteile-
Unn mach en große Sprung ehr Leit:
en große Zeitsprung dorch die Zeit
Iwwer siwwe hunnert Johr am End
vom Alte ins Neie Testament
"Ich bin de Weistock- unn ehr sinn d`Reewe"
des esch die Botschaft, wu uns Jesus hot gewwe
damit mer`s Leewe mit ihm uns gelingt
wu gure Frucht -en sinn- uns bringt
"Ich bin de Weistock -ehr sinn d'Rewe.
Bleiwen doch in mer- unn ehr sellen lewe!
Bleiwen doch bei mer! Do bringen er Frucht
wie weit unn brät se mancher sucht.
Unn lewen er so vun meim Lewenssaft
durchstreemt mein Geischd eich unn mei Kraft."
So fruchtbar Rewe- des -sinn selle,
wu ihm offs Wort dun- heere welle,
die d' Ohre offsperrn unn aach sofort
dun, was se selln do on ehrm Ort.
Ä guri Reb schmeißt mer nit weg!
Die werd gebutzt, kummt nit zum Dreck!
Die Welt, die braucht doch G'rechtigkeit,
kann peife off all die Schlechtigkeit,
aß jeder blouß on sich selwert denkt
unn de Karre debei in de Grawe lenkt!
Die Welt, die braucht Vestand mit Herz!
Die hot genung vun Leid unn Schmerz!
Die braucht doch Ehrforcht vor dem Leewe
unn Leit, wu noch em Rechte strewe,
daß d' Schepfung werd erhalte
unn Friede det off Erde walte
unn mit de Blutdat weer Schluß unn End,
weil mer vun Jesus die Botschaft kennt.
Dort dut mer däle sei Brot unn de Wei
Unn do esch Jesus mittedrin debei.
Er esch's, wu mit seim Geischt unn Kraft
so unner uns Gemeinschaft schafft.
Er gebt uns all sei Kraft zem Leewe
-im Bild gesproche:"Saft der Rewe"
DER Saft, des esch sei gures Wort
sei Däf, sei Nachtmal- Hier unn dort
im Wort unn aach in Brot unn Wei
do will Er immer bei uns sei.
Unn greeßer noch als unser Schuld
esch sei Lieb unn iwwergroß Geduld.
Unn des: damit mer nit vezaache
unn unser Gläwe Frucht dut traache:
die Hoffnung, wu nit bloß in d`Fräd
uns traache will- nä! aach im Läd
unn do, wu nix ze hoffe esch.
Esch des nit wie im Paradies:
wu Lieb esch, wu de anner stitzt
unn nit bloß froocht, obs mer was nitzt?
Wu' s Herz määh zeehlt als alles Geld!
Braucht des nit unser aarmi Welt?
Daß änner dem annere helft in d' Not,
des braucht mer doch wie's däglich Brot!
Ä gures Wort- Ve'ständnis, Root,
Kritik aach monchmol mer needisch hot,
wu helfe will unn zem Gure lenke
unn Anreechung, mol noochzedenke
wie do bei uns des, was Jesus will
dät gschäne- unn Frucht deet reife gut unn still
Wie d'Trauwe reifen bei uns am Ort
sell bei uns wirke vun Jesus des Wort!
Des weer doch was, wanns so bei uns weer:
daß iwwerall ER find Geheer
wann er saacht: d Weistock bin ich- ehr sinn wie d`Rewe!
Bleiwen doch in mer, so hänner `s Lewe !
Drum dun mer gut dran, uns an Jesus ze orientiere
Sei Wort will uns all zem Gure hiifiehre,
daß mer nit vegeblich sucht
in unserm Leewe gure Frucht
wann mer heern an unserm Ort
off sei gures hilfreich Wort:
Bleiwen doch bei mer! Des esch erst Lewe!
Ich bin de Weistock- unn ehr sinn d Rewe!

TOP